RIWAYA TAMU: JUDITH…JUDITH…! - 4

INNOCENT A. NDAYANSE (ZAGALLO)

0755 040 520 / 0653 593 546 

  

Makella anawaamuru wenzake wawaue wanafamilia wote katika nyumba ya Mzee Ndaishimiye isipokuwa Judith tu ambaye amempenda na anataka kumuoa. Ni mwanzo mbaya na kumbukumbu za kutisha kutokana na mauaji yaliyotokea. Je, wenzake watatii? Ungana na msimulizi wako…

Na ilikuwa kama alivyoamuru. Ni Judith pekee aliyebaki hai. Ndipo Makella alipomwamuru Judith kusimama, amri ambayo Judith hakuwa na budi kuitii, na ndipo pia akashikwa mkono na  kuburutwa akipelekwa nje. Huko pia alikokotwa kama mzoga, akitembea kwa tabu kutokana na kuishiwa nguvu mwilini. Angezipata wapi nguvu ilhali muda mfupi uliopita ameshuhudia wazazi na ndugu zake wakiuawa?

Kwa jumla hakuwa timamu kiakili. Athari za kisaikolojia ziliutawala ubongo wake. Tukio la muda mfupi uliopita lilikuwa ni kama ndoto isiyopendeza akilini mwake.

********** 

WALIPOFIKA mbali kidogo, Makella aliwaambia wenzake, “Tangulieni…ninataka kuongea kidogo na Judi.”

Wenzake walimtazama kidogo na kutii maneno yake. Wakatangulia mbele, yeye akabaki na Judith nyuma wakitembea taratibu. Kisha Makella akamshika mkono Judith na kumtomasa kidogo kiganjani. Kisha akasema, “Sikia Judi, mtoto mzuri, tambua kuwa uhai wako una maana kubwa sana kwangu, uhai wako ni zaidi ya mimi ninavyojali kuwa hai! Niko tayari kufa kuliko kushuhudia wewe ukiuawa. Naomba uniamini. Wewe haukupaswa kuuawa ingawa katika operesheni ya leo tulipaswa kumuua kila Mtutsi tutakayemtia machoni. Lakini kwa amri yangu wewe umebaki!”

Kufikia hapo alitulia kidogo na kumtazama Judith kwa makini akitarajia pongezi, jambo ambalo Judith hakulifanya. Zaidi, aliuinamisha uso wake kwa majonzi, machozi yakambubujika.

Makella alimgusa begani na kusema, “Pole sana Judi. Usilie. Tulia mpenzi. Umepona kwa sababu naujali sana uhai wako. Naujali uhai wako kwa kuwa nakupenda kwa dhati. Mapenzi yangu kwako ni mapenzi kutoka moyoni.”

Walikuwa wamekwishavuka nyumba zaidi ya nne kutoka kwao Judith na kwa ratiba yao ilikuwa sasa askari hao wasitishe zoezi lao. Hivyo walikuwa wakirudi kambini.

Wakati huo Judith alianza kurejewa na utulivu kichwani. Akawa amepungukiwa na woga kwa kiasi kikubwa, badala yake hasira ndizo zikamjaa moyoni kwa kiwango kisichokadirika. Isitoshe chuki dhidi ya Makella ilikuwa ikimtawala kwa kiasi kikubwa. Akahisi kitu kama kaa la moto likimkwama kooni!

Alijua kuwa ilimpasa sasa kupiga moyo konde na kuwa makini, akitambua fika kuwa chochote atakachokifanya kinyume na mapenzi ya Makella kinaweza kuyagharimu maisha yake. Huyu Makella amekuwa akimfuata kwa muda mrefu. Na haya maneno yake anayomwambia hayakuwa kipimo sahihi kuwa ana mapenzi ya dhati, hapana. Kwa hilo Judith hakutaka kujidanganya.

Kama amekwishadiriki kuua watu kama vile kuua panya au mende na hata amediriki pia kuwaua wazazi wake na wadogo zake, mbele yake, ni kipi kitamfanya asite kummaliza yeye kama atagundua kuwa bado hapendwi? Makella ni mtu mwenye moyo wa binadamu au mnyama?

Akilini mwake alimchukulia Makella kama binadamu mwenye akili ya mnyama japo alikuwa na viungo vya kawaida, akizungumza kama binadamu wa kawaida na akivaa kama binadamu wa kawaida Hivyo, jambo moja aliamua kuliwekea nadhiri; kuwa tayari kuilinda heshima yake hata kama itabidi kuyagharimu maisha yake.

“Unasikia mpenzi?” Makella aliendelea. “Wewe haustahili kufa! Wewe ni malkia wangu na ni malaika wangu! Judi! Utakuwa mke wangu! Tutaishi maisha mazuri katika nyumba yenye hadhi, nyumba nitakayokabidhiwa na serikali baada ya kufanya kazi hii kwa ufanisi. Haya nd’o matunda ya kuwa mwanajeshi!

“Utakuwa mke wa askari mwenye cheo cha juu. Hutasumbuka kwa kufanya kazi za ndani zitakazouchosha mwili wako…hapana…kutakuwa na watumishi wanne watakaokuwa wakifanya kazi za ndani na nje. Kazi yako kubwa ni kukaa na kucheki muvi, ukinywa bia au soda kwa raha zako, basi! Jioni tunatoka na kwenda kupata nyama choma mahali huku tukishushia bia, eti?”

Itaendelea kesho...