RIWAYA TAMU: JUDITH…JUDITH…! - 5

 

INNOCENT A. NDAYANSE (ZAGALLO)

0755 040 520 / 0653 593 546 

Mauaji ya Watutsi yamefanyika, na mbaya zaidi Makella, anayeongoza mauaji hayo, ameamuru wenzake waue wanafamilia wote katika nyumba na Mzee Ndaishimiye na aliyesalia ni Judith peke yake ambaye yeye anadai kwamba anampenda. Anamchukua na kuondoka kuelekea kambini huku akimuahidi makubwa wakati ‘watakapochukua nchi’. Je, Judith atakuwa salama? Nini kitaendelea katika riwaya hii? Ungana na msimulizi wako…

Judith hakujibu. Hakuwa na akili ya kujibu chochote. Kwa ujumla hakuwa timamu kiakili kwa wakati huo.

“Mpenzi, utakuwa na gari!” Makella aliendelea. “Kwa ufupi utaishi kama uko  paradiso, ukiwa ni mke wa mwanajeshi, na mwanajeshi mwenyewe ni mwenye madaraka makubwa jeshini na ana pesa! Nani kama wewe?”

Yote hayo yalipenya masikioni mwa Judith kwa utulivu mkubwa. Eneo hilo lilikuwa tulivu na  askari wengine walikuwa wametangulia mbele kwa kiasi cha hatua kama hamsini hivi, hivyo kila alichokisema Makella kilipenya masikioni mwa Judith kwa usahihi mkubwa.

Judith alimsikia lakini hakumwelewa, na hakuwa ni mtu wa kuelewa chochote kutoka kwa Makella  wakati huo. Baba, mama na wadogo zake wameuawa kikatili na hawa watu waliomteka! Halafu eti huyu mmojawao anamliwaza kwa maneno laini na kumwahidi maisha bora!

Ni maisha gani bora atakayopata chini ya himaya ya huyu mtu ambaye moyo wake hautofautiani na ule wa fashisti Adolph Hitler aliyedhamiria kukiteketeza kizazi cha Waisraeli katika Vita Vikuu vya Pili vya Dunia? Katika vita vile Hitler aliwaua Waisraeli zaidi ya milioni 6, huyu Makella na wenzake katika haka kanchi kadogo sana, tayari wameshaua maelfu ya watu kwa muda mfupi tu! Ni kwa nini wasifananishwe na Hitler?

Eti Makella anamrai kwa maneno matamu! Akilini mwa Judith hiyo ilikuwa ni ndoto nyingine, ndoto isiyopendeza, ndoto mbaya zaidi iliyomtabiria kifo kibaya, zaidi ya vifo vilivyowakuta wazazi wake na wadogo zake.

Wakati huo walikuwa wamesimama, mkono mmoja wa Makella ukiwa begani kwa Judith na mwingine ukimtomasa matiti.

“Na leo hutalala kambini,” Makella aliendelea. “Tutakwenda Kiyovu Hotel. Mrembo kama wewe haustahili kulala sehemu duni na kulala na watu wengine wasiokuwa na mpango. Eti mpenzi?”

Kama ambavyo awali hakujibu, safari hii pia Judith alibaki kimya. Lakini pamoj  na hayo kwa mbali alihisi ujasiri ukimwingia. Na alitambua kuwa umakini ulipaswa kupewa kipaumbele vinginevyo maisha yake pia yatakatishwa na mtu huyo kama mzaha!

Akakumbuka kuwa mara kadhaa, siku kadha wa kadha zilizopita, Makella alimtongoza lakini hakumkubalia ombi lake. Sababu? Hakumvutia! Ile sura yake yenye makovu na kichwa ambacho ni kama kilifinyangwa na msanii mchanga, kikiwa hakitofautiani na mchoro wa msanii maarufu wa katuni, msanii achoraye picha za kutisha au kuchekesha, vilikuwa ni vigezo vya awali vilivyomshusha hadhi na kumfanya  Judih asimfikirie kwa namna yoyote.

Mhutu! Kabila hilo nalo, kwa Judith lilikuwa ni kabila lisilokubalika wala kuthaminika nafsini mwake, ni kabila lisilostahili kuwepo duniani! Ni kabila ambalo ni hatari zaidi ya hatari yenyewe! ‘Nimvulie nguo Mhutu! Tena Mhutu mwenyewe anayetisha zaidi ya kifo!’ alijisemea kimoyomoyo kwa kujiapiza.

Ndiyo, hakuwa radhi kuwa na uhusiano wowote na Makella, iwe ni kwa mapenzi ya muda mfupi au hata ya kudumu. Lakini usiku huo yuko naye. Wako wawili tu! Tena mbali na kwao Judith! Ni Makella huyuhuyu ambaye tangu mchana hadi usiku huo tayari alishatoa roho za watu ambao hata idadi yao haikumbuki! Roho za Watutsi! Baba, mama na wadogo zake Judith wakiwa miongoni mwao.

Afanye nini?

Ujasiri ulihitajika katika kuulinda msimamo wake na ilihitajika hekima katika kuchukua uamuzi wowote atakaoona unafaa kwa kuilinda hadhi yake na kuulinda uhai wake.

Itaendelea kesho...