TAIFA KWANZA!: FAMILIA YA MANETI YAZURU HOSPITALI YA MWANANYAMALA ALIKOLAZWA HADI KIFO CHAKE MWAKA 1990

Friday, 6 June 2014

FAMILIA YA MANETI YAZURU HOSPITALI YA MWANANYAMALA ALIKOLAZWA HADI KIFO CHAKE MWAKA 1990

JUMAMOSI iliyopita (Mei 31), palifanyika jambo moja kihistoria, pale familia ya mwimbaji nyota wa zamani Hemed Maneti, ilipoandamana na wadau wa wamuziki wa dansi kutembelea hospitali ya Mwananyamala ambako ndiko alipougulia mwimbaji huyo hadi kufariki dunia miaka 24 iliyopita.

Maneti alifariki katika hospitali hiyo tarehe 31 Mei 1990 baada ya kuugua kwa muda mrefu na kwenda kuzikwa kijijini kwao Mamboleo, wilaya ya Muheza mkoani Tanga.

Familia hiyo na wadau hao wa muziki wa dansi, ikaitumia tarehe hiyo ya kumbukumbu ya kifo cha kipenzi chao, kwenda kuitembelea hospitali ya Mwananyamala, hususan wodi aliyolazwa Maneti na kutoa misaada ya mashuka, kufanya usafi pamoja na kuwasabahi wagonjwa wa wodi hiyo.

Mungu ana miujiza yake! Unajua kitanda alicholazwa Maneti kilikutwa vipi? Kilikutwa na maiti ya mgonjwa aliyekuwa amelazwa kitandani hapo na kufariki muda mchache kabla ya ziara hiyo ya familia ya Maneti iliyoongozwa na mzazi mwenzie, Kida Waziri, mwanae wa kike Komweta, mtoto wake wa kiume Maneti Hemed na Sadru ambaye ni mkwewe.

Kwa vile wadau na familia hiyo walikuwa wakitandika mashuka mapya katika kila kitanda, wakalazimika kuuhamisha mwili waliokuta kwenye kitanda cha Maneti na kutandika shuka jipya kisha kuurejesha tena mwili huo kitandani hapo.

Hadi anafariki, Maneti alikuwa ni kiongozi wa Vijana Orchestra “Air Pambamoto”, bendi aliyoiongoza kwa takriban miaka 16, lakini cha ajabu hakuna mwanamuziki hata mmoja wa bendi hiyo aliyeshiriki katika ziara hiyo ya Mwananyamala Hospital licha ya kushirikishwa katika kila hatua.

Msafara huo ulijumuisha waandishi, watangazaji na mashabiki wa muziki wa dansi.