SERENGETI YAIBUA VIPAJI VINGI TANZANIA

Hivi karibuni kampuni ya bia ya Serengeti imekuwa mstari wa mbele kuleta vipaji vya waimbaji mbalimbali kupitia tamasha lake la kila mwaka la Serengeti Fiesta.

SBL imeweza kugundua vipaji mbalimbali kupitia mashindano iliyokuwa ikiyafanya wakati wa matasha hayo kama vile bonanza la mpira wa miguu na la uimbaji maarufu kama Supa Nyota Divas.

Young Killa ambaye ni moja ya vipaji vilivyogunduliwa wakati wa matamasha hayo anatarajiwa kuja kuwa mmoja wa mastaa nyota wa muziki wa hip hop kwani tayari ameshakonga vilivyo nyoyo za mashabiki katika sehemu mbalimbali ambazo shoo za Serengeti Fiesta zilipita.

Kijana huyo aling’amuliwa katika tamasha la Serengeti Fiesta lililofanyika Mwanza.

Wakati ziara ya tamasha la Serengeti Fiesta ikikaribia ukingoni, kulikuwa na maswali mengi toka kwa watu mbalimbali waliovutiwa kutaka kujua haswa nini maana ya Serengeti Super Nyota Divas na lengo  la mashandino hayo ni nini haswa.

Super Nyota Divas ni shindano ambalo lilitoa nafasi kwa idadi kubwa ya wasichana kulitumia kuonyesha vipaji vyao katika kuimba, na kupitia shindano hilo vipaji mbalimbali viling’amuliwa na majaji na washindi kupatikana.

Kupitia mikoa yote ambayo Serengeti Fiesta ilipita mwaka huu, kulikuwa na shindano la Super Nyota Divas na hadi kufikia sasa karibia washindi 15 wamepatikana ambao watasafiri kwenda Dar es Salaam kushudia shoo ya mwisho ya tamasha hilo.

Kama sehemu ya washuhudiaji wa shoo, washindi wa Super Nyota Divas hao wapatao 18 wanatarajiwa kushindana na washindi wengine wa Super Nyota Divas wa mwaka jana jijini Dar es salaam.

Akizungumza na waandishi wa habari, mmoja wa washindi wa Super Nyota Divas katika tamasha la mwaka huu la Serengeti Fiesta hakuficha kuonyesha furaha yake na alikuwa na kitu cha kusema.

Attu Charles ambaye ni mshindi wa Super Nyota Diva toka mkoa wa Iringa alisema....”Serengeti Fiesta 2014 imenisaidia kufahamika kama msanii nashukuru kwamba baadhi ya nyimbo zangu sasa zinapigwa katika vituo mbalimbali vya redio.

Attu pia hakuficha ukweli kwamba baada ya kuibuka mshindi toka mkoa wa Iringa, wazazi wake sasa wameamini kwamba ana kipaji cha muziki na kuanza kumsaidia tofauti na ilivyokuwa hapo mwanzo.

Anna Hillu a.k.a Ania toka Mwanza alisema.....”Serengeti Fiesta 2014 imenisaidia kujiamini na imenipa matumaini ya kufanikiwa katika safari yangu ya kimuziki.” Akizungumzia kuhusu fainali ya shindano la mwisho litakalofanyika Dar es Salaam, Ania aliendelea....”naamini kuwa kila mmoja ni mshindi kwani matokeo ya kila msichana alishinda toka katika mkoa wake yalionyesha jinsi yalivyo bora.”

Victoria Sostennes kutoka Moro alisema…”Ninashukuru kampuni ya bia ya Serengeti kwa kuanzisha aina hii ya mashindano kwasababu kupitia haya mashindano ndipo kipaji changu kiligunduliwa na sasa siwezi kusubiri tena kushinda katika fainali itakayofanyika Dar Es Salaam sababu naamini nina kipaji.