WAKAZI WA MANISPAA YA SONGEA KUONDOKANA NA TATIZO LA MAJI

Na Julius Konala wa demasho.com, Songea

WAKAZI wa Manispaa ya Songea mkoani Ruvuma, wataondokana na tatizo la upatikanaji wa maji lililowakumba kwa muda mrefu hususan kipindi cha kiangazi baada ya kuanza kwa ujenzi wa mradi mkubwa wa kitega maji.
Mradi huo ulioko katika eneo la Ruhira mjini humo unaotekelezwa na kampuni ya Sinani Building Contactors Ltd yenye makao yake makuu mkoani Mtwara utagharimu kiasi cha zaidi ya Shs. 2 bilioni mpaka kukamilika kwake.

Hayo yalisemwa jana na Meneja Ufundi wa Mamlaka ya Maji Safi na Usafi wa Mazingira (Souwasa) Manispaa ya Songea, Mhandisi John Kapinga, wakati alipokuwa akizungumza na baadhi ya waandishi wa habari ofisini kwake kuelezea utekelezaji wa mradi huo.

Kapinga alisema kuwa mradi huo mpaka kukamilika kwake unatarajia kukidhi mahitaji ya wakazi wa Manispaa hiyo kwa asilimia 60, kusukuma maji lita 6,500 pamoja na kuhifadhi lita zaidi ya 800,000 za maji jambo ambalo amesema litasaidia kupunguza tatizo la mgao wa maji kwa wakazi hao.

Alisema kuwa tatizo kubwa linaloukabili mradi huo ni juu ya upatikanaji wa fedha kwa ajili ya kumlipa Mhandisi Mshauri na Mkandarasi jambo ambalo amedai lisipochukuliwa hatua za haraka linaweza kukwamisha maendeleo ya ujenzi wa mradi huo ikizingatiwa bado kipindi kifupi cha kuanza msimu wa kifuku.

Naye Mhandisi wa kampuni ya Sinani Building Contactors Ltd inayojenga mradi huo, Faustin Otaru alisema kuwa kati ya kazi zinazofanyika hivi sasa ni kuchimba mitalo kwa ajili ya kujenga ukuta katika eneo hilo la mradi lenye ukubwa wa mita za mraba 25,000.

Otaru alizitaja changamoto wanazokumbana nazo katika utendaji wao wa kazi kuwa ni pamoja na kutitia kwa mitambo ya kufanyia kazi,ubovu wa njia za kuingilia magari kwenye eneo la mradi pamoja na ucheleweshwaji wa fedha za kufanyia kazi jambo ambalo amedai kuwa linaweza kukwamisha maendeleo ya mradi.

Wakizungumza kwa nyakati tofauti na Waandishi wa habari hao katika eneo la mradi baadhi ya wakazi wanaozunguka eneo la mradi huo walisema kuwa kukamilika kwa mradi huo kutasaidia kupunguza tatizo la maji na kudai kwamba wameweza kunufaika na kampuni hiyo kwa kupata ajira ambayo imewawezesha kufanya mambo mbalimbali ikwemo kusomesha na kulipa kodi katika nyumba walizopanga.