WAANDISHI WANAWAKE WANG'ARA EJAT

Dar es Salaam. Waandishi wa habari wanawake wameibuka kidedea kwenye tuzo za Umahiri wa Uandishi wa Habari Tanzania (EJAT) kwa mwaka 2013, baada ya kunyakua tuzo 13, huku Kampuni ya Mwananchi Communications Limited (MCL) ikishinda tuzo tano kati ya tuzo 19 zilizoshindaniwa.

Sherehe ya utoaji tuzo hizo, ambazo mgeni rasmi alikuwa Rais wa Mahakama ya Afrika Mashariki, Jaji Harold Nsekela ilifanyika kwenye Ukumbi wa Mlimani City, ambapo kazi 907 zilishindanishwa kuwania tuzo katika vipengele 19, ikiwemo ya mshindi wa jumla.

MCL inayochapisha magazeti ya Mwananchi, The Citizen na Mwanaspoti iliendeleza historia yake ya ushindi katika tuzo hizo baada ya kuwaingiza wateule 15, huku mwandishi wa Mwananchi, Kalunde Jamal akinyakua tuzo mbili (Michezo na Burudani na Afya).

Waandishi wengine wa MCL walioshinda tuzo zao kwenye mabano ni Musa Juma (Kundi la wazi) na Beldina Nyakeke (Watoto) kutoka gazeti la Mwananchi na Zephania Ubwani (Mazingira) kutoka The Citizen.

Kwa upande wa zawadi, mshindi wa kwanza kwa kila kipengele alipewa tuzo, cheti na simu ya Samsung S3 na mshindi wa pili na wa tatu walipewa kisimbuzi na dishi la DSTV.

Waandishi wa Habari wa MCL wamekuwa wakifanya vizuri katika tuzo mbalimbali nchini. Katika Tuzo za EJAT zilizotolewa mwaka jana, waliotwaa tuzo hizo ni pamoja na mshindi wa jumla Lucas Liganga wa Gazeti la The Citizen.

Mbali na kutoa mshindi wa jumla, waandishi sita walioshinda na tuzo zao katika mabano ni Edward Qorro (Uchumi na Biashara), Lucas Liganga (Mazingira na Malaria), Fredy Azzah (Ukimwi na Elimu), Anthony Mayunga (Utawala Bora) na Florence Majani aliyetwaa tuzo ya Sayansi na Teknolojia na Afya ya Uzazi.

Redio zilizong’aa

Kwa upande wa tuzo za redio, Afya Redio ya mkoani Geita ndiyo iliyong’ara zaidi kwa kushinda tuzo 10 kati ya 19, huku ikitoa mshindi wa jumla, Idd Juma Yusuph ambaye alikabidhiwa zawadi ya cheti na Dola 4,000.

Tuzo zilizochukuliwa na redio hiyo ni Biashara na Uchumi (Harith Jaha), Mazingira (Idd Juma Yusuph), Ukimwi (Peninah Kajura), Sayansi na Teknolojia (Cecilia Ndabigeze), Elimu (Noel Thomson) na Afya ya Uzazi (Regina Kulindwa).

Tuzo nyingine ni Kundi la Wazi na Afya (Clara Patrick), Ulemavu na Kilimo (Idd Juma Yusuph).

Wengine walioshinda tuzo za redio ni Gervaz Hubile wa TBC FM (Malaria), Hawa Halifa Msangi wa Kili FM (Utawala Bora), Grace Kiondo kutoka Hits FM (Watoto), Makwaiya Jumanne wa Victoria FM (Jinsia) na Abdallah Majura kutoka ABM FM (Uchunguzi).

Kwa upande wa waandishi wa magazeti, tuzo zilimwendea John Bwire kutoka Raia Mwema (Uchumi na Biashara), Romana Mallya wa Nipashe (Ukimwi na VVU), Khadija Musa kutoka Uhuru (Utawala Bora) na Richard Makole wa Nipashe (Jinsia).

Pia wamo Mwantanga Vuai kutoka Zanzibar Leo (Sayansi na Teknolojia), Peter Orwa wa Uhuru (Elimu), Manyerere Jackton kutoka Jamhuri (Utalii na Uhifadhi), Anthony Siame wa Mtanzania (Mpiga picha), Mashaka Mgeta kutoka Nipashe (Afya ya Uzazi kwa vijana), Polycarp Machira wa The Guardian (Uchunguzi) na Deus Bugaya wa Raia Mwema aliibuka na tuzo ya Kilimo.

Tuzo zakosa washiriki

Akielezea namna upigaji kura ulivyofanyika, Mwenyekiti wa majaji wa Ejat, Gervas Moshiro alisema waandishi wa habari wanapaswa kuongeza zaidi ubora wa kazi zao kwa kuwa nyingi zilizoangaliwa hazikuwa na kiwango kinachotakiwa.

Akitoa mfano, Moshiro alisema mpiga picha bora wa televisheni hakupatikana kutokana na kukosa sifa ingawa kazi nyingi ziliwasilishwa kushindaniwa.

Alisema kuwa televisheni ndiyo zilizokosa zaidi washindi kuliko redio na magazeti kwa kushindwa kupata tuzo katika habari za kilimo na biashara, Ukimwi na VVU, uchunguzi, Malaria, watu wenye ulemavu, sayansi na teknolojia, vijana na afya ya uzazi na michezo na utamaduni.

“Washindani walikuwepo lakini kazi hizo zilipowekwa kwenye ubora wa kufuata vigezo zilishindwa kabisa na ikabidi jopo liseme hakuna mshindi,” alisema Moshiro.

Magazeti yalishika nafasi ya pili kwa kukosa washindi, ambapo waandishi wa habari za malaria na watu wenye ulemavu walikosekana, huku redio zikishindwa katika kipengele cha uhifadhi na utalii.

“Magazeti kama chombo yamepata washindi 46, redio washindi 39 wakati runinga ikipata washindi 19 na kukosa washindi kwenye maeneo tisa,” alisema.

Katika kazi zilizopelekwa kushindaniwa, vipindi vya redio ndivyo vilivyotajwa kuwa na ubora kuliko kazi za vyombo vingine, ikifuatiwa na magazeti na televisheni.

Katibu Mtendaji wa Baraza la Habari Tanzania (MCT), Kajubi Mukajanga, alisema kazi zinazopokelewa zimeongezeka kutoka 304 mwaka 2009 hadi 907 mwaka 2013.

Pia idadi ya wateule nayo imepanda kutoka 89 mwaka jana hadi 101 mwaka 2013, na kwamba ongezeko hilo linaonyesha kuwa kazi bora zimeongezeka.

CHANZO: MWANANCHI