MAMA ALIA: VVU IMEKATISHA NDOA NA WAUME ZETU!

Pichani kutoka kushoto Martha Steo,Tamasha Kalukanya na Janepha Japhet Sahani wakiwa katika picha ya pamoja Kituo cha Afya Ilolangulu Uyui mkoani Tabora. (Picha na Hastin Liumba).

Na Hastin Liumba,Uyui

"HIVI sasa nina wakati mgumu sana napita makanisani na misikitini kuomba misaada ili niweze kutunza watoto wangu hawa wanne...

Hali hii imetokana na kukimbiwa na kutelekezwa mume wangu na alinitelekeza baada mimi kupimwa virusi vya ugonjwa wa UKIMWI na kuonekana nimeambukizwa VVU.

"Niko kwenye wakati mgumu sana hivi sasa natamani kama nisingezaliwa naumia sana nikiangalia watoto hao nitawapeleka wapi na ndugu na mume wamenitenga."

Hayo ni maneno ya Martha Steo (29) mkazi wa Kijiji cha Ilolangulu, Wilaya ya Uyui mkoani Tabora akiueleza ujumbe wa shirika lisilo la kiserikali la EGPAF ukiongozwa na Mratibu wa Mawasiliano Mercy Nyanda na waandishi wa habari.

Shirika la EGPAF limekuwa likitoa sapoti ya kutokomeza maambukizi ya VVU toka kwa mama wajawazito kwenda kwa mtoto chini ya ufadhili wa US Centers for Disease (CDC) na United States Agency for Intetion Development (USAID) toka nchini Marekani.

Steo anaeleza alipata maambukizi ya VVU mwaka 2014 pale alipopata ujauzito na kupimwa Kliniki ya Ilolangu.

Alisema baada ya kupimwa na kukutwa na VVU alipata ushauri na kuanza kutumia dawa na alifanikiwa kujifungua salama na mtoto wake hana maamubukizi ya VVU.

Alisema baada ya kukutwa ana VVU alimweleza mume wake naye aje kituo cha afya apime ili kama ameambukizwa VVU naye aungane naye kwenye tiba.

Alisema wazazi wa mume wake hawako mbali na anakoishi yeye lakini amejaribu kufanya nao mazungumzo ili wamsaidie kutunza watoto lakini wamegoma.

‘Wazazi wa mume wangu hawako mbali na ninapoishi lakini wamegoma kabisa kunisaidia kutunza watoto wangu…….. wamenitenga.’alisema Steo.

Aidha Steo anasema alipata taarifa mume wake na Baba yake walikwenda kupima VVU lakini majibu ya mume wake hayajui na anajisikia vibaya kuona mtoto wake ametelekezwa na baba yake bila kosa lolote.

Anasema maabukizi ya VVU ni yetu wazazi lakini leo hii mtoto anahukumiwa bila kosa lolote kwa kunyimwa haki zake kama mtoto inaumiza sana.

Anatoa wito kwa mama wajawazito kujitokeza kupima afya zao ili kama wana maambukizi ya VVU waanze tiba kumkinga mtoto aliyeko tumboni.

Naye Tamasha Musa Kalukanya (32) mkazi wa kijiji cha Ideke kata ya Mabama wilaya ya Uyui mkoani Tabora naye alikutwa na mkasa wa kukimbiwa na mume wake baada ya kukutwa ameambukizwa VVU.

Kalukanya anasema alikutwa na VVU mwaka 2013 baada ya kupimwa akiwa na ujauzito na alipopimwa na kukutwa ana VVU mara moja alianza kutumia dawa ili kumkinga mtoto wake asiambukizwe VVU.

Anasema yeye alikuwa akiishi na mume wake lakini mara baada ya kugundulika ana VVU mume wake alimkimbia na kumtelekeza.

Alisema alijaribu kuwasiliana naye kwenye simu alimjibu kuwa yupo wilaya ya Kahama mkoani Shinyanga.

“Niliwasiliana naye akaniambia yupo Kahama na nilijaribu kumshauri na nilimweleza kuwa nimeambukizwa VVU……hakujibu chochote alikata simu.”alisema.

Anaeleza toka nilipomueleza nina VVU lakini mtoto nimejifungua na yuko salama hadi leo hii nikipiga simu haipatikani inaonyesha amebadili namba hataki tuwasiliane.

Hivi sasa anasema anaishi maisha magumu sana kwani anafanya biashara ya viazi na kulima mahindi ili yamsaidiie kutunza familia.

Anasema ndugu na jamaa zake na mume wake wamemtenga kana kwamba ugonjwa VVU alionao wanauna kama mkosi kwao.

Alisema anaiomba jamii kuondokana na dhana hiyo kwani kilimtokea hakukiomba na aliwasihi kinamama wenzake hasa wajawazito kujitokeza mapema kuhudhuria kliniki ili waweze kutambua afya zao.

Alisema kitendo cha wajawazito kuchelewa kuhudhuria mapema kliniki kunaweza kuhatarisha afya zao na mtoto aliyeko tumboni.

Anasema kuwa VVU si jambo la ajabu huo ni ugonjwa kawaida kama magonjwa mengine wajitokeze kupima afya zao.

Jane Ibasa (30) mkazi wa kata ya Ilolangulu wilaya ya Uyui mkoani Tabora amedai ameambukizwa VVU toka mwaka 2014.

Ibasa anasema yeye binafsi aligundulika kuwa na VVU baada ya kupimwa kliniki ya Ilolangulu akiwa mjamzito.

Alisema alipopima na kukutwa na VVU alianza tiba na Mungu alimsaidia kujifungua mtoto ambaye hana maambukizi.

Alisema baada ya vipimo alimweleza mume wake juu ya afya yake na alimshawishi kuja kupima na mume wake alipima na kwa maajabu ya Mungu hakuwa na maambukizi ya VVU.

Alisema mume wake amepima kwa hatua zote tatu na ameendelea kutoa majibu ambayo yanaonyesha hana mambukizi yenye VVU.

Alisema mume wake mara baada ya kupimwa na kukutwa hana maambukizi ya VVU alimweleza hana mpango wa kumuacha wataishi wote.

“Najisikia amani sana baada ya mume wangu kunieleza ataendelea kuishi name milele hadi kifo kiwatenganishe…..sikutegemea nilijua nitatengwa na kutelekezwa kama ilivyo kwa wenzangu.”alisema.

Mratibu wa mawasiliano wa shirika lisilo la kiserikali la EGPAF Mercy Nyanda alitoa wito kwa wajawazito kujenga tabia ya kuwahi kupima afya zao hatua zote nne kliniki ili waweze kutambua afya zao.

Nyanda anasema mama wajawazito watalinda afya zao watoto wao endapo watakuwa wameambukizwa VVU kwa kupata tiba stahiki.

0788390788 hastinliumba@gmail.com